Wednesday, December 29, 2010
خطورة استخدام المنشطات فى كمال الاجسام
5:21 PM | 
Posted by
Admin |
اول حاجه بيفكر فيها الشباب دلوقتى ازاى يعملوا جسم او فورمة بسرعه جدا يفضل يلعب طبيعى ومافيش اى فايدة من الى بيعمله يروح تفكيره للمنشطات الى تعرف بأسم steroids
و المنشطات صحيح بتديلك الفورمة الى انت عاوزه فى فتره قياسيه جدا بس حاجه قصاد حاجه انت عارف يعنى ايه بتلعب فى هورمونات جسمك يعنى انت بتلعب فى كل وظائف جسمك بتراهن على صحتك و رجولتك و اعضاء جسمك كلها و فيه شباب كتير مات بسبب الاستيرويدس دى و ناس كانت نهايتها فشل كلوى و امراض فى الكبد و المصيبه الاكبر عجز جنسى و فيه انواع كتيره من المنشطات دى زى الديكا ودى اشهر حاجه الحقنه ام 8 جنيه و السستانون و البرومبيلان و التستيرون و انواع كتيره اوى كلها خطر على الصحه والمشكله ان الكابتن هوا الى ممكن يكتبلك على كورس منشطات و هوا هدفه الاول انه يكسب من وراك فلوس حلوه مايهموش صحتك ولا اى حاجه يا جماعه والله هتندم انت مممكن يكون كمان جسمك عنده حساسيه من منشط معين وانت مش عارف و ممكن تموت بسبب الموضوع ده
طبعا ابطال العالم فى كمال الاجسام بيخدوا منشطات و مش اى منشطات منشطات اصليه و غاليه جدا زى الجروس هرمون و ده هرمون النمو فى الانسان و بيعرف بأسم
GH GROWTH HORMONE
و غير كده فى طبيب متخصص بيتابع حالتهم و بيعملهم فحص قبل الكورس و اثناء الكورس و بعد الكورس علشان يتأكد ان صحته كويسه انما انت يا غلبان مش عارف انت بتاخد ايه اى حاجه و خلاص و بعد الكورسات بتاخد حاجه اسمها منظفات يعنى بترجع مستوى الهرمونات عندى للوضع الطبيعى و بتاخد منشطات للكبد و حاجات كتيره الكابتن الى بيدربك مش هيدهالك مثال الناس الى بتاخد ديكا و سستانون اثناء فتره الكورس حجم الخصيه بيصغر و بتكون عصبى على طول و بيظهرلك حبوب فى ضهرك و جسمك و اعراض كتيره وانت طبعا ما بتاخدتش اى منشطات للكبد او مش عامل اى احتياطات صحيح جسمك هيظبط بس هتخرج بعد الكورس متبهدل لانك لعبت بهرمونات جسمك كلها
طيب الى فى الصوره ده شكله حلو ؟؟
طيب نتكلم شويه عن الاعراض الجانبيه
ارتفاع ضغط الدم
عصبيه
حبوب
زياده مستوى هرمون الانوثه
تحميل زياده على الكبد و الكلى
احتماليه عجز جنسى
كفايه كده ولا اكمل ؟
وده فديوهات بتتكلم عن اخطار المنشطات من دكاتره معروفين
المهم الموضوع ده كبير و يطول شرحه انشاء الله هبقى اكتبلكم موضوع ازاى توصل لفورمه كويسه بدون الابر و المنشطات و الفرق ما بين المكملات الغذائيه الامنه و المنشطات
وعلى رأى المثل الى نفخ عمره ما هيرجع طبيعى زى الاول
مستنى ردوتكم وانا جاهز لاى استفسار
ازاى تخلى الاوضه روشه اخر حاجه
كتير اوى من الشباب نفسهم فى اوضه شخصيه ليك لوحدك و تكون اوضه روشه و جامدة طحن بس محتارين شويه فى انهم يخلو الاوضه بالشكل ده و مش عارفين ايه الطرق الى تروشن الاوضه انا هنا هديكم شويه نصايح زى الفل تخلى اوضه النوم صاروخ ارض جو
طيب اول حاجه انت تحدد اهتماماتك طيب يعنى ايه الكلام ده
انت بتحب ايه كوره ولا اغانى ولا افلام ولا اهلى ولا زمالك ولا برشلونه ولا بوب مارلى ولا جيفارا ولا ايه بالظبط اى اهتمام مش هيفرق على فكره
بعد ما تححدد انت عاوز ايه اسمع بقى الزتونه
مثلا انا هختار بوب مارلى انا واد صاحب دماغ عاليه و حشاش و مش فارقه معايا احنا كده اخترنا انطباع عن الاوضه بتاعتى كل ما عليك انك تنزل اى رصيف ولا اى محل بيبيع بوسترات مغنيين تنزل تجبلك كام بوستر بوب مارلى على مارجوانا على كام بوستر مدلع كده
بص على الصور دى كده
وفيه ناس بتحب الكورة هندى مثال على برشلونه مثلا
برده نفس الحوار و فى اى حوار تنزل تجبلك كام بوستر حلو للحاجه الى انت بتحبها و تحط البوسترات فى اماكن متوزعه مثلا فوق السرير بوسترين و جنب الدولاب نظم بقى حالك
طيب خلصنا من موضوع البوسترات نيجى بقى للحاجات التانيه
حط الكمبيوتر بتاعك فى مكان حلو كده و هاتلك سب وفر حلو علشان لما تشتغل اغانى و تظبط نفسك و السبات مش غاليه اوى ده فيه ب 50 جنيه و انت طالع هاتلك الى يناسب الميزانيه بتاعتك
طيب نيجى بقى لحوار مهم اوى هو الاضائه طبعا لو حضرتك من النوع الدحيح هاتلك لمبه نيون او لمبه موفره للكهرباء بجانب الاسبوتات و الشغل الى هنتكلم عليه دلوقتى
اختار لونك المفضل احمر اخضر ازرق اصفر فحلقى اى بتنجان
فيه بقى لمبات جامده اوى الى بتلاقيها فى نوادى البلاى استيشن دى الى هيا عباره عن لمبه لونها بنفسجى اضاءتها خافته بس لما بتيجى على حاجه لونها ابيض بتدى فسفورى بتحس ان هدومك بتنور و اى حاجه لونها ابيض بتنور معاك و ده احسن لمبه ممكن تحطها فى الاوضه بس مش فاكر سعرها اوى بس هيا مش غاليه حتى لو غاليه هى تستاهل صراحه
و الباقى بقى هسيبه لابداعك الشخصى يعنى هاتلك ملايه عليها الفريق المفضل بتاعك و روح لمحلات الاكسسوارت وانت تلاقى حاجات هتعجبك وانشاء الله تبقى اوضه روشه و ماتنساش تكتبلك حاجه على الباب من بره مثلا احترس احمد شرس
وحطلك استيكر جمجمه ولا اى حاجه و عيش
Subscribe to:
Posts (Atom)